mércores, 16 de novembro de 2011

Voto


As cousas están como están, e mentres me entran pola xanela os lemas de campaña que uns ou outros berran pola megafonía mentres agardan o cambio do semáfono (se parece absurdo que alguén mude o sentido do voto tras ver a propaganda nas caixas de correo do portal ou pegada nos muros, pensar que o vai facer por escoitar a berros unha consigna en plena rúa non sei xa o que pode parecer) cerro os sobres que conteñen o meu voto para este Domingo fatal.
A señorita Kaplan chamou onte ao serán para asesorarme, pero non fixo falta: seguindo a Ignacio de Loyola, nestes tempos de tribulación en que non cómpre mudanza, votarei ao mesmo partido ao que levo votando toda a vida, o único que me garante o apoio incondicional á miña lingua e probablemente o que menos se lixou con corruptelas e mercadeos.
Meu pai di que non entende de política, que el vota aos socialistas porque herdou o voto de seu pai, que xa lles votaba na República; miña mai anda atrás de min co feixe de sobres e papeletas que lle chegaron por correo para que lle explique como votar ao PSOE pero excluíndo a Pepe Blanco; a miña sobriña afirma que case seguro non irá votar; o meu cuñado para estas cousas é unha esfinxe; a miña irmá di que está farta de ZP, de leires e bibianas, pero que uns lle parecen rancios e os outros (por favor!) demasiado radicais; a señorita Kaplan conta que súa mai, salomonicamente, votará BNG para o Congreso e PSOE para o Senado porque ten medo do cataclismo que anuncian as enquisas.
E eu, meus queridos, confeso que máis dunha vez pensei facer caso á señora da foto (que pillei aquí), e escribir ben clariño FRANZ KAFKA co rotulador gordo e vermello sobre as dúas papeletas, pero non o farei porque, para alén de indignado, descorazonado e amargado, sinto que o voto antisistema de momento non vai comigo.
Aínda que ao paso que vamos, quen sabe, poden facer apostas. 

16 comentarios:

peke dixo...

Kafka ou branco, tanto ten. Mellor que non sexa nulo. Que conste.

Dilaida dixo...

Hai algúns días estiven dubidosa, pensaba no voto útil... Agora xa o teño máis que claro, nin o medo á chegada do PP, nin a Gran Depresión van conseguir que eu non sexa fiel ao BNG. Iso non quere dicir que estea totalmente de acordo con todo o que fixeron (con algunhas cousas conseguiron cabrearme de verdade)pero dentro do malo penso que é o mellorciño que temos nesta terra.
Ao Senado votarei en branco, non estou de acordo con ese "club de xubilados".

paideleo dixo...

A política é un malo necesario pero necesario e muita xente morreu para que nós teñamos hoxe dereito a escoller.
Eu sei que ninguén é perfecto pero hai onde escoller.
Non digo a quen vou votar que nunca se sabe quen le isto.

A nena do paraugas dixo...

Decidirei o meu voto diante da hurna, coma sempre, pois nin son de voto útil, nin de voto condicionado, ni de voto ideolóxico. E como ninguén me convenceu aínda, ata pode que meta o sobre baleiro.
Pero votar, si que hei votar. Como di Paideleo, custou moito chegar ata aquí.

xenevra dixo...

Nunha situación kafkiana cómpre un voto meditado, consciente e organizador. Aínda non sei moi ben de que, pero eu tamén sei que por riba de todo está a miña lingua e a miña terra... (ben de todo, de todo,non. Sempre que a opción sexa de esquerdas. Custou moito volver aquí)

Anónimo dixo...

pois eu tamén teño claro o meu voto, así que non é necesario que faiga reflexión.

biquiños,
Aldabra

rula dixo...

Pois eu votar, tamén votarei polo que costou chegar a aquí, e mira ti o rápidiño que acabamos con todo.

O que está claro, e que votemos ou non, saia quen saia rematou o xogo da DEMOCRACIA que tanto nomean.
Agora tócanos bailar o son dos mercados, está claro que tras 3 anos de CRISIS, o sistema non cambiará.

Así e todo, Resistiremos.

zeltia dixo...

o voto antisistema é en sí mesmo unha contradicción, non lle parece?
haberá que utilizar os medios dos que dispoñemos...?
haberá.

mfc dixo...

Gosto desta ironia que usas nos teus escritos!
Um grande abraço.

Maribel-bel dixo...

Vexo certa democracia na xente que te rodea, falades abertamente do voto. O domingo dentro da miña familia non se pode tocar o tema, porque empeza a discusión e pérdense as formas. Alo menos manifestarse sen pudor e abertamente. Un saúdo

Chousa da Alcandra dixo...

Concordo no absurdo da campaña electoral. Penso que unicamente sirve para que cada cal nos reafirmemos nas nosas querencias.

pinguim dixo...

Infelizmente irá ganhar o PP e a Espanha terá um Primeiro Ministro que não merece.
Na minha modesta opinião, Rajoy não fará melhor que Zapatero e os que o irão eleger amanhã, cedo se arrependerão, pelas medidas que ele irá tomar.
Vai suceder o mesmo que aqui: puseram o Sócrates na rua e agora estão arrependidos do voto que deram a este...

susana moo dixo...

Boeno, pois a sorte xa está votada e botada e a nosa función finalizou,... finalizou?

Anónimo dixo...

¿vai todo ben?

¿non quedaría sin fala polas elecciós Sr. Kaplan?

espero que non, que sexa un asunto informático o de traballo o que o manteña alonxado.

biquiños,
Aldabra

zeltia dixo...

pois eu estaba pensando o mesmo que Aldabra...

está tardando moito en postear, é raro.
eu xa lle quero ver a súas pinzas de crustáceo polo meu blog!

Chousa da Alcandra dixo...

Da gusto que se preocupen por un. Ou polos dous.

---Zeltia ten ganas de marisco, carallo!---