sábado, 16 de xullo de 2011

Procrastinación

Como na canción de Fuxan os ventos: Procrastinar procrastinarei, apesar de que agora todas as cousas que adiei nas últimas semanas forman unha especie de muro insalvable contra o que me baten a enerxía e a vontade; iso si, sigo sendo un campión creando xustificacións e pretextos para calmar a conciencia, a saber: se non recollín onte os resultados das análises foi porque seguramente non estarían, como indicou a muller extractora.
Se non fun facer as gafas, aínda vendo menos que un moucho a mediodía, foi polo que lle vai gustar á señorita Kaplan axudarme a escoller unhas novas.
Se non me puxen a mirar colchóns para cambiar o que teño é porque terei máis tempo á volta, como se comprar tal cousa requirise meditalo unha eternidade e mais un pouquiño.
Se non me puxen a limpar os cristais das ventás está claro que é porque o tempo non acompañou, ninguén limpa cristais orvallando fóra.
Se non fun devolver os libros na Biblioteca é por se a nena o Luns quere coller algo para ler na viaxe.
E finalmente, se despois de dous anos aínda está sen pintar o teito da cociña será porque aínda queda moito(s) Verán(s) e até moita(s) vida(s) por diante, o que en definitiva me serve para xustificar non ter quedado con Tere Holmes para irmos cear por aí, nin con Calmo para posibles citas ou xantares eufemísticos, nin con Polis para intercambiarmos neuras, nin con aquela metade da miña axenda a quen prometín chamar un destes días para nos vermos e laretar un pouco ou o que fose.
Así van correndo os días, e xa estamos a metade de Xullo.

7 comentarios:

Ra dixo...

Procastina, que algo queda ;)

mariajesusparadela dixo...

Xa haberá tempo.

Aldabra dixo...

¡que doce é a preguiza!
xa o facereí
xa irei
xa chamarei

compréndoche... antes eu era das que levaba todo ó día e non deixaba para mañá o que podía facer hoxe... agora, dexio para mañá o que non me gusta facer hoxe e vou facendo o resto... e que a vida é moi curta como para andar votándoa perder limpando cristais... mira ti... si as veces para o que hai que ver, non paga a pena...

en fin, que xa voltarei, e non o digo por preguiza, dígoo por gusto.

biquiños,

susana moo dixo...

Nin gafas, nin colchón, nin amigos ... pero qué raio estás a facer?

X dixo...

Levo dous meses procastinizando, pero non lle vexo eu moito futuro a isto da procastinización peor non me podo permitir o luxo de elixir o máis pracenteiro para hoxe e o peor para mañá.
Por certo, cambiaron Venecia de sitio?
Aquí seguimos. Saúdos.

Peke dixo...

Kaplan querido, non esqueza nunca, nunca, que estamos de vacacións. Que se fai en vacacións? Vostede dirá.

pinguim dixo...

E vem aí o Santiago, a 25!!!