mércores, 13 de xullo de 2011

Postal

(Foto de Teddy)
Teño recibido postais de tres continentes e desde os lugares máis previsibles, de Nova York a Varsovia e do Cairo a  Ushuaia, pero hai uns días chegoume unha desde un lugar impensable e talvez por iso é máis valiosa: o Cádavo.
Quen a asina é Teddy, e vale como recordatorio da agradabilísima xornada que pasamos un Luns cos manchegos J. e A. por unha Ithaca bimilenaria e ruinosa: o Parque parece que foi bombardeado, na Catedral bulen os obreiros levando bancos e botando lonas, e a unha das torres os andaimes déronlle aspecto de pagoda.
Aínda así, os amigos manchegos marcharon encantados: nin a Muralla nin a gastronomía, o que máis gratamente os sorprendeu foi o cinto verde que rodea a cidade, e do que percorremos varios kilómetros no seu 4x4 até acabarmos estomballados nunha terraza xunto ao río, entre bañistas adolescentes e ameneiros centenarios.

4 comentarios:

Anónimo dixo...

Dende unha casa allea, nun ordenador e furtivamente hoxe quero estar aquí aínda sen ter nada que dicir, só por sentir.

mariajesusparadela dixo...

A idade dos adolescentes compensárona os ameneiros ( e vostedes, supoño)

zeltia dixo...

Cádavo?
en Lugo?

Anónimo dixo...

non tivera nunca ouvido falar de O Cádavo, tuve que buscalo na rede... podías contarnos tí algunhas cousas do pueblo.

e que as veces falamos de cousas pensando que os demais tamén sabemos e non... hoxe ademais non deixache enlaces...

¡xa estás preguiceiro polas vacacións!

biquiños, e a seguir disfrutando.
Aldabra